OION, MUGA EDERREAN

Euskaltzaindiaren izenean, Arabako ordezkari bezala, zuen artean izatea eta zuekin hitz egiteko abagunea edukitzea ohore handia da niretzat.

Euskaltzaindia pozik dator gaur zuen festa alai honetan parte hartzera.

Araba Euskarazko ospakizuna aurten Oionen egiten da. Muga herria da Oion. Muga ederra.

Adibide sinboliko bat erabiliz, Oiongo oihaneko zuhaitz sendo bezala ikusten zaituztet zuek, hemen zareten San Bizente ikastolako eta ikastola guztietako kideok. Guraso, arduradun, irakasle, ikasle eta alde askotatik etorritako lagunok.

Dakizuen bezala, oihana mota askotako landareek osatzen dute. Eta horrez gain, oihanez oihan aldatuz doa haien osaketa. Ez da gauza bera Iratiko izei-pagadoia, Labrazako pinaduia (gaurko piñudia), zein Oionen litzatekeen Artederreta basoa; eta, hala ere, denak dira oihanak, basoak, tokian tokiko landarez osatuta.

Euskal oihanekin gertatzen dena, gure herriekin ere horrelako zerbait jazoten da. Herriz herri bagabiltza aldaerak nabaritzen dira haien artean, baina, hala izanda ere, euskal herrien artean badago hizkera lotura amankomun bat, itxuraz herri diferenteak direnak, izaeraz haiek batzen dituena. Euskal Herrian hizkera lotura hori euskara da. Euskara da gehien eta nabarien batzen gaituena, izena eman diguna eta izana azaltzen lagun duguna.

Oion hemen dago, Historiaren bilakaera luze baten ondoren, muga batean jarrita. Muga batean izatea, alde askotatik begiratuta eta batez ere kulturaren aldetik muga izate horri begiratzen badiogu, egoera hori aukera askoren gunea gerta liteke.

Gero eta gehiago, gaurko munduan, pertsona bakar bakoitza muga askoren artean mugitzen da; muga horietan aurkitzen diren balore ederrenak ongi eta egoki hautatzean pertsona horren bilakaera harmonikoa eta oparoa gerta daiteke.

Horretarako sortu ziren ikastolak. Gizon eta emakume euskaldunak sortzeko eta pertsona prestuak osatzeko. Horretan dihardu egunez egun Oiongo ikastola honek.

Kementsu ari zarete guztiok hemen, muga-herri eder honetan, gizon eta emakume osoak egiten laguntzeko adore handiz irakasten eta zuengan daukazuen hoberena ume eta nerabeei ematen.

Oiondarrak eta oiondartuak, muga herrian diharduzue. Muga ederrean. Araba, Nafarroa, Errioxa. Gune aproposa lan mamitsuak egiteko. Hitzaldi hau Euskaltzaindiaren lemak dioenarekin amaituko dut: Ekin eta Jarrai!

Oionen, 2009ko ekainaren 21ean
Manu Ruiz Urrestarazu
Euskaltzaindiaren Arabako ordezkaria



Saludo de Manu Ruiz Urrestarazu, representante de Euskaltzaindia de Álava, el día21 de junio en la fiesta del Araba Euskaraz de Oion. "En nombre de Euskaltzaindia os puedo decir que hemos venido muy contentos a la fiesta del Araba Euskaraz, a este pueblo que está en la muga con la Rioja y Navarra".

"Los bosques los forman muchos tipos de árboles, no es lo mismo la selva de Irati que el pinar de Labraza, con los pueblos ocurre lo mismo: somos de aspecto y hasta de carácter diferente, pero lo que nos une y nos da nombre es el euskara."

"Las ikastolas surgieron para hacer euskaldunas a las personas, y así trabajáis en San Bizente ikastola. En esta tierra fronteriza estáis dando lo mejor para educar a vuestros niños y niñas y adolescentes. Como dice el lema de Euskaltzaindia seguid trabajando (EKIN ETA JARRAI)".